مذكرات الغريب

أهلا وسهلا بزوار موقع الغريب الشخصي .... كيف حالكم ....السموحه لأني ما اكتب مذكرات جديده وهذا بسبب انشغالي بالعمل وهي فتره وان شا ءالله تعدي على خير . الموقع من فتره ما طورته ولا وضعت فيه اي شيء غير المنتدى فيه الشباب ما قصروو بالتعاون معي .... وبصراحه ما اعرف شوو اقول بالضبط  اتمنى الكل يكون بخير وعافيه تحياتي

التاريخ واليوم

السلام عليكم ورحمه الله وبركاته ... أهلا وسهلا بكم مره ثانيه بموقع الغريب والحمد لله تم الاعفاء عن الغريب ههههههههههه لالا ما كنت مسجون كنت شبه محبوس الهم رجعلت لعالمي العنكبوتي . من اليوم ورايح بيكون دخولي فقط بالاجازات وهذا لضروف شغلي واتمنى باني اكون قادر بكتابه مذكراتي والشغل بالموقع وتطويره ووضع الكثير من الاشياء التي تعجبكم وتفيدكم بالموقع . بصراحه اكتشفت بان الحريه شيء كبير لدى الانسان وما في احد يعرف قدرها الا ما تفقدها او تحرم منها . وما اعرف شوو اقولكم لان ما عندي موافق صارتلي مأخرا علشان اكتب او احش بها بس ما عليكم بفكر واذا عندكم اشياء حابين اكتب عنها لا تترددون بارسل عناوينها على البريد الاكتروني الخاص بي وانا سوف ادرس الموضوع واعبر عن رأي في الموقع بشكل واضح وصريح الحينه بخليكم لاني بشوف الموقع واخباره والمنتدى ايضا .

التاريخ واليوم

السلام عليكم ورحمه الله وبركاته .. كيف الحال يا اخواني واخواتي زوار موقع الغريب يمكن هذي اخر مذكره بتكون لي لانني سوف اغير فتره عن الموقع يمكن تقريبا شهر وشي. المهم والله بنشتاق للشبكه العنكبوتيه واخبارها . بس ما عليكم بحاول احزن المذكرات في بالي ولحد ما اوصل البيت واكون امام الكمبيوتر بكتب كل شيء  علشان اعوضكم عن الايام الي ما كتبت فيها . واتمنى تسامحوني اذا غلطت في انسان بالنت ولا برع النت .  هذي الايام قاعد اجهز نفسي للذهاب وضاربني حفوز هههههههه بس يالله هب مشكله فتره وبتعدي . هالله هالله بالمنتدى والموقع . ولا تنسووون الدعاء لاخوكم الغريب بكل صلاه.

التاريخ واليوم

اضغط على الصوره لتكبيرها

اضغط على الصوره لتكبيرها

لا تضحكون على الخط اولا وثاني ادري البعض يبا يعلق بس ما بعطيكم مجال تعلقون ادري الكثير بيحط علي

التاريخ واليوم

بعد غياب طويل بعدم الكتابه في مذكراتي الخاصه وبصراحه انا لما دخلت سجل الزوار الخاصه بموقع الغريب لقيت مسج يقولي ما وضعت مذكرات جديده وهذي المسجات تشجع الانسان يكتب اكثر بس انا احس خلاص خلص الكلام ولاشووو رايكم

الهم واخيرا قربت اخلص من موقع الميراا من تصميمي وتطويري بالكامل واتمنى بان اصحابه ينعجبون فيه وهم بصراحه وايد يمدحونه وفرحانين فيه واهم شيء باني زرعت الفرحه في وجوههم القوو النظر على الموقع وعطوني رايكم فيه واتمنى حتى انتوو يعجبكم

والشيء الثاني باني طورت بموقع الغريب والمنتدى ايضا ووضعت سجل الزوار لموقع الغريب  واتمنى تعبرون عن كلمات ولو بسيطه عن رايكم بموقع الغريب والشيء الثاني باني وضعت لنك مباشر للفوتوشوب لان ناس كثير يسالون عن الفوتوشوب ويبونه ولذلك انا وضعته على سيرفر الموقع حقي علشان يسهل تنزيل البرامج بسهوله واتمنى الدعاء لاخوكم الغريب بالخير

اما اخر شيء وهو مغادره الغير بعد اقل من اسبوع وبغيب فتره تقريبا شهر ما بتشوفون مذكرات الغريب بس اول ما يخلص الشغل اسبوعيا بكتبلكم مذكرات جديده ومغامرات جديده وتنقيعات بالكلام جديده ههه بخليكم علشان اكتب المذكره الثانيه بطريقه ثانيه هذي المره واتمنى تعجبكم

التاريخ واليوم

البارحه الله يسلمكم من تاريخ اليوم وهو يوم الخميس واحد من الشباب قالي لازم تروح معايه القريه العالميه قلتله اوكيه مافي مانع وما عندي شيء اسويه . حذت عمري ورحنا القريه العالميه وقالي بانه عنده استيكر الشخصيات الهامه وجان اتفجج قلت الحينه بنوقف عن الشيوخ  واخر شيء طلع استيكر اضني للباصات والتكاسي والاداره هههههههههه بس يالله مشيناها . المهم دخلنا القريه العالميه وعندي تعليقات على بعض الاشياء وهي تعليقات شخصيه احب اعلق على كل شيء شفته هنا.

قسم الألعاب :   الله يسلمكم هذا القسم خطير ومثل ما يقولون الشباب احلى شيء في هذا القسم هو البنات لما يركبن الالعاب . في بعض الالعاب مره للشباب ومره للبنات لما يركبون الشباب ما تشوفون احد تحت اللعبه يشوف الراكبين بس تعالوو لما البنات يركبن كل احد يخطف لازم يوقف يشوووف تعرفون ليش لان البنات خطيرات يصارخن ويسووون حركات ويشلن الغشوه بصراحه بعضهم منقبات . انا بصراحه وقفت اشوف حالي مثل حالهم هههههههه بس استغربت من شيء ثاني باني اشوف شباب يصورووون بالتلفون الله يعين البنات والله . والشيء الثاني الي استغربت منه بان بعض البنات الي لابسات غبايه من تحت لابسات قصير لحد الركبه امممممم ادري بتقولون الغريب  شفت البنات بصراحه شفت شوو اسوي من صريخهن وحركاتهن باللعبه وشفت شوو لابسات انا ما قلت شيء غلط لانه شيء عام وبمكان عام هذا الشيء . بس واحد من الشباب هوه دوم يروح القريه قالي احسن مكان للترقيم هوه السيارات الي يتداعمن ومت من الضحك اقوله ما شاء الله الخبره تلعب دور كبير . كان خاطري العب العاب الذكائيه للحصول على هدايا بس خذنا الوقت ورحنا نتمنى من بين القرى .

القريات :    القريات عجيبه بصراحه بس شيء واحد ما عجبني وهو ينادونك من غير احترام ويوقفون امامك علشان يعرضون سلعهم والله ما صار قريه صار زريبه في نظري من كثر الزحمه . وعجبني شاي الكرك في القريه السيلانيه وعجبني اللبس في القريه المغربيه وعجبني العطور في القريه القطريه .

بائعات المحلات :     شوو اقولكم ولا اقولكم  بس روحوو القرى ولاحظوو البائعات هناك والله كل وحده احلى من الثانيه ولبسها كانها رايحه عرس ما تبيع بمحل . والي لاحظته في القريه بان البنات ينادن الشباب اكثر شيء والشباب تعرفووون ما يصدقون وحده تناديهم  وهيه تعاطيهم من الكلام الحلووو  وحليل الشباب علشان يقردن لازم يشتري شيء وهكذا الشغله . قلت خلني اجرب واشوف شوو يصير كنت امشي ووحده ما ندتي وقلت يالله صرت صيده لهذي البنت ورحتلها وقامت تروحني من العطور المخلطه قلتلها زين والله حلو ريحته العطور قالت انتا الحلوو . ول لو واحد ثاني جان طار من الفرحه جان اقولها بقولج شيء قالت نعم قلتلها كم واحد قلتيله هذا الكلام  علشان تمشين شغلج تصدقون بحلقت عيونها  بس ربيعي خرب كل شيء قالها ما بترومين على محمد راعي امريكا .

بس انا غلطت بشيء رحت محل ثاني للعطور وعجبني العطور وايد كانت حلووه وكنت ابي اشتري عطور للسياره  وانا توني داخل القريه قلت مافيني اشغل الكيس وانا تمشى قلتلها برجع قبل ما اطلع وبشتري من عندهم  اكيد كانت وحده المهم رحلت ونسيت ما ارجعلها وتذكرتها لما ركبنا السياره قلت ول ما اشتريت العطوووور وانا وعدتها باني امر عليها .

وقبل ما اطلع من القريه تعيشت من مطعم ربيعي يعرفه والله اكلني سندويش ماانصح تاكلونه وهو سندويش مكسيكي حشى مب سندويش هذا نار يحرق مووت خلصت البيبسي كامل من حرارته . بس هذا كل الي سويته في القريه العالميه .

التاريخ واليوم

أهلا وسهلا بكل زوار موقع الغريب البسيط والمتواضع . اليوم كانت الصحوه الصبح صعبه بس كنت لازم اصحى علشان اروح الشارقه . علشان اخلص شغله التامين يعني استلم الشيك . استلمت الشيك ورحت للبنك وصرفت المبلغ وبعدين على طول رحت الوكاله للتويوتا  واشتريت سياره  كامري رقم الثنين بكل المواصفات اخترتها لون ابيض . ادري البعض بيقول متى بيحط صورها لا لا انسوو ما بحط الصور هذي المره عيون الناس ما ترحم . يوم حطيت صوره سيارتي الاولى ما توفقت فيها وهذي المره ما بحط اي صوره لها . المهم خلصت من الوكاله كنت بروح السي تي سنتر واتغدى هناك تميت افكر قلت لا خلني ارجع الذيد احسلي وما رجعت ما تغديت ما ادري .

وقفت محطه للبترول وكان هندي واقف ويحاول يقنعني اشتري بطاقات اللكزس ام 200 درهم اقولها انا من سنين ما فزت والحينه بفوز هههههههه بس كان عنده بطاقات ثانيه  تشتري بطاقه تعبأه للتلفون ب 50 درهم وفيها رصيد 40 درهم يعني هم يستيفيدون 10 دراهم . بس شوو الميزه الي فيها بان فيها  4 بطاقات للسحب اشتريت  كم بطاقه وسجلت اسمي ورقمي وان شا ءالله يكون هناك نصيب ولو مره بالعمر . 

رجعت البيت وقعدت قلت شوو اسوي بالموقع ابي اغير فيه او احط شيء يديد فيه ولحد الان انا افكر قلت خلني اكتب مذكره لاني ما كتبت من فتره . على فكره اذا عندكم افكار حلوووه  للموقع وبسيطه ياليت تخبروني علشان شوي نطور من موقعها .

التاريخ واليوم

مذكره او موضوع اليوم مختلف انا كنت اشاهد المنتدى وجذب انتباهي  موضوع باسم كلمات أكثر من رائعه وحبيت اقرى هذا الموضوع بس بطريقتي الخاصه حبيت اضع الكلمات هنا واعلق عليها ولرأيه الموضوع كامل اضغط هنا

النجاح سلم لا تستطيع تسلقه ويداك في جيبك...
هذي الجمله وايد حلوه وعجبتني النجاح ما يأتي بسهوله والذي ياتي بسهوله يذهب بسهوله ويداك يدل عليهم بالجمله يجب عليك الحركه للوصول للنجاح بس بعض الناس بياخذون الجمله كما هي ولكن الجمله لها معنى كبير للوصول للنجاح

قد تنسى من شاركك الضحك ..لكن لا تنسى من شاركك البكاء .

سمحولي اقول في هذا الزمن عكس هذي الجمله بالضبط والي اقصده الناس تحاول تشاركك الافراح فقط وقليل من يشارككن البكاء . وقت الفرح خلووونا نفرح معاهم الناس تقول بس لما البكاء يقولون انا شوو لي دخل بمشاكلهم او بكائهم  سبحان الله  هذا الواقع .

لا تفكر في المفقود .. حتى لا تفقد الموجود .

يا سلامي على هذي الجمله بصراحه مافيها حيله وهي جمله تعطي حماس للموجود بكل انواعه والتمسك فيه ونسيان المفقود ان كان ماديا او معنويا

بصراحه هذا الموضوع عجيب فيه الكثير من الجمل واتمنى زيارته

التاريخ واليوم

هذا فلم واحد من الربع صوره واتمنى يعجبكم بس لا تضكون وايد

واذا عندكم اي تعليق اضغط هنا

واذا عندكم اي تعليق اضغط هنا

التاريخ واليوم

الطموح كلمه نسمعها بس هل نطبقها او نأم بها كل انسان يطمج بان يكون عنده فلوس وشركات او اي شيء يتمناه بس هو عنده طموح يسعى لهذا الشيء امممممم  البعض ما اعتقد لاني بقولكم شوو يدور في بال بعض الناس .  البعض يقوم انا مالي حظ وان شاء الله الله يرزقني كيف الله بيرزقك والا انتا ما تسعى وهذيلا ينتظرون الوحي او اي احد يجيبهم بالي يبونه وينتظرون سنين واخر شيء يقولون مالنا حظ . البعض الاخر يقول الي يعيش الكبير ونحن ما نقدر نوصل مثلهم ابدا أو يقولون الكبير كبير والصغير صغير في اعتقادي لو الواحد له طموح ويسعى للشيء بيوصله . واكبر دليل لو احد منكم قرأ   كتاب رأيتي للشيخ محمد بن راشد ال مكتوم  وايد زين يعطي حماس بالانسان ولو هو صغير او فشل مش معناته اليأس لان اذا حطيت اليأس في قاموسك ما بتنجح ابدا . انا اقولكم هذي الاشياء حسب خبرتي بتفكير الشباب الي اسمعلهم . والبعض يفكر بالعلالي بعاطيكم مثل   جدار كبير جدا  اطول عنك تقدر توصله مره واحده ما بتقدر ابدا ولو تميت تقفز بتتعب بس لو كان عندك درج تصعد عليه بتصعد وانتا مرتاح للعلالي وهذا مثال على الشيء الي حاب تسويه بحياتك . الشباب الي يهديهم يقولون ما عندنا ملايين علشان نسوي هذا وهذا  يعني بالعقل ليش ما تسوون شيء على قد حالكم او تتعاونون . وبالعض الاخر ياخذ سلفيه في بدايه شغله ليشتري سياره فخمه مثلا ب 300 الف درهم  وبعد فتره يقول ابي اسوي وابي اسوي  وبعدين يقول ما اقدر لاني عندي دين اصلن منوو ضربك على ايدك وقالك تديل ؟ هل خطط هذا الانسان لمستقبله علشان يعرف شوو الي له والي عليه . ودايما اقعد مع الشباب يقولون نحن بنسوي وبنسوي وبنسوي انزين ليش تقولولي ليش ما تسوون وترجعون وتقولولي نحن سوينا . لو كل واحد يرسم خطه مستقبله لمده ثلاث سنوات لمستقبله والله الكل بتشوفونهم عايشن بس لا حياه لمن تنادي ؟ الدنيا اغرتهم بمظاهرها وهذا همهم الوحيد في الوقت الحالي .

التاريخ واليوم

ما أعتقد بان سنه 2008 سنه خير عليه من اول السنه حادث او بالاصح دعموني وانا واقف اليوم وبتاريخ هذا اليوم واحد يمشي بسرعه كبيره من الشارع الثاني  وانا كنت واقف امام المطعم وجالس داخل المطعم المهم السياره الثانيه صدم حمار وكان مسرع كثير والسائق فقط التوازن بالسياره وراحت سيارته من الشارع حقه للشارع الثاني من الجهه الثانيه المهم كانت سيارته متجهه داخل المطعم بس كانت سيارتي بالمرصاد ما خلته يأذيني بدخول السياره في المطعم المهم صدم سياراتي بقوه من الامام ومثل ما تشوفون بالصوره . قاعد افكر وشوو هذي البهدله وانا اداوم في بوظبي منوو بيوديني ومنو بييبني من هناك والله حاله . والحينه لازم اراكض ورى التأمين علشان السياره . وانا بعد شهر عندي دوره . بس اخوكم الغريب دائما يقول وعلى لسانه وعسى ان تكرهو شيء وهو خير لكم . سبحان الله يمكن خيره هذا الي استوى ليه انا . والله جلساتي بالبيت بتطول الحينه وخاصه على النت ههههههه . الحمد لله انا مبسوط لان السياره الثانيه ما دخلت المطعم ولا تسببت بأصابه الناس الي في المطعم . والله يعوضني بشيء احسن يارب العالمين .

اللكزس سيارتي

التاريخ واليوم

للتجاره اساليب مختلفه بقولكم موقف استوالي وكان فيني الفضول كنت ذاهب برجمان  اشتري شيء ولما كنت اتمشى صادفني واحد سوري او مصري ما اذكر بصراحه وعطاني بطاقه وقالي يمكن تفوز بسفر لمصر او الحج .انا استغربت وقلتله ماشيء ببلاش في هذا الوقت وانا متاكد بان ورى هذا الشيء شيء . المهم قالي انتا بتدخل السحوبات باجر ويمكن تفوز  قلتله ما بدخل بالاكيد بفوز وبتنادوني قالي يصير خير المهم بالباجر اتصلولي وقالولي انتا فزت قلت مسرع المهم قلتلهم بييكم اليوم وانا رايح الدوام . رحتلهم اول ما وصلت هناك استقبلتني السكرتيره ومعاها ورقه وتقولي اكتب اسمك ومعلومات ووقع بانك بتجلس معنا  90 دقيقه وقلتلها ول  ما يصير  قلتلها بعدين بقعد 20 دقيقه فقط  اذا ما عجبني الوضع المهم وانا داخل القاعه اشوف الناس متضايقه والي يعرق والي ينشف المهم قعدت وياني واحد مصري . وقلتله من الاول اختصر الموضوع عليه لان هناك حركه انتو بتسوونها  قالي لا افا عليك المهم بدأ يسالني عن الحج والعمره قلتله بو الشباب شوو تبا اذا انا بروح الحج ولا العمره اختصر الموضوع المهم ما رضى يصارحني المهم قمت ورحت وامشى رايح برع وينادولي المديره ويركضون وراي المهم اخر شيء قالتلي المديره بنيبلك واحد متخصص يفهمك شوو المشروع قلتله يعاطيني الذبده ولما جاء الثاني كان الوت من الاول اونه يلف ويدور عليه المهم قلتله اونك ذكي قول من الاخر وخلصني ولا تضيع وقتي معاك . اخر شيء قالي هناك مشروع تشتري شقه في مكه قلتله كم الشقه قالي 45 الف درهم قلت والله شيء حلوو  وفي نفس الوقت استغربت قالتله قولي من الاخر واعطي الاوراق الاساسيه المهم هوه طفر من اسلوبي بس ما قدر يقول المهم اخر شيء قالي ادفع 2000 درهم رسوم الاشتراك بانك بتشتري الشقه وبعدين بنعاطيك الثمن الرئيسي . قلتله انتا عبيط ولا تستعبط عليه المهم اخر شيء عصبت عليهم والكل يشوف عليه وطلعت .  استغربت من تمثليه هذي الشركات الغبيه  والاغبى من هذا الناس المساكين الي جالسين 90 دقيقه واخر شيء يدفعونهم ههههههه .

التاريخ واليوم

كل عام وأنتم بالف خير وعافيه في السنه الجديده وعدنا 2007 والان نرحب بقدوم عام جديد 2008  وان شا ءالله تكون سنه خير على الجميع . نترك الاحزان والمشاكل والمواقف التي لا نحبها تذهب مع 2007 ولكننا لا نترك خبرتنا والاشياء الحلوه تذهب مع 2007 نجعلها معنا دائما . والي تعلمناه في 2007 لازم يكون معنا دائما . والعالم كله استقبل 2008 بكل رحب ويجب باننا نكون مستعدين هذا السنه بكل ما فيها من حلووو ومر . وبالنسبه لي انا متفائل بهذي السنه مع اني سوف انشغل بهذا السنه بالدوره ولي مدتها تقارب  9 شهور  . ما ادري اتمنى سنه  2008 و 2009  يمرن بسرعه علشان  احصد زرع  2007  أدري مب فاهمين شوو اقول بس هذا خطه مستقبله لازم الكل يفكر بالمستقبل . في اخر 2007 انا عملت نقله كبيره في حياتي  واكيد بضغط شوي على نفسي لمده سنتين وبعد السنتين ان شا الله الله يفرجها واشوف النتيجه الطيبه مثل ما يقولون تفائلو بالخير تجدوه .

التاريخ واليوم

كل عام وانتم بالف خير وعافيه ويعود عليكم هذا العيد الاضحى بالسرور كل سنه وحول يارب العالمين .  أكيد اليوم الكل يجهز بقدوم العيد باجر  والي اشترى اللبس والنعول والملابس الغاويه الله اشوف السعاده والسرور في وجوهكم يارب . انا ما عيدت في الامارات من ثلاث سنوات وهذي اول مره بعيد في الامارات . بس تبون الصراحه واناالي احسه بان فرحه العيد ما صارت بداخلي ما اعرف ليش يمكن لاني ما تعودت عليه من فتره طويله . ما ادري شوو بيصير باجر وما اعرف وين بروح بس بصراحه انا وايد اشتقت لربعي الي بامريكا  كنا نقضي العيد مع بعض وغير يا ناس العيد برع يخطف بسرعه . والله يا ناس باجر العيد بنشوف  مجاملات ومظاهر على كيف كيفكم والخقات بعد ههههههههههه . باجر بسوي نقله كبيره في عالمي الملابسي بلبس كندوره زرقاء  ههههههههه اكيد بتضحكون بس يالله بنجربها وشوو ورانا .  هيه نسيت اقولكم باني غيرت الواجهه للموقع واتمنى تنال على اعجابكم .

وكل عام وانتم بخير

دايما تسمعون الناس تقول الواقع شيء والحقيقه شيء ثاني -- وناس تقول نعيش ونشوف -- وفي امثال كثيره تخلف الواقع- شوو رايكم بأقرب الناس لكم ؟ نعم الكل بيقول اوكيه لانهم اقرب الناس لي بس لا تاخذون هذا المنظر لكل الناس لان اقرب الناس مرات يكونون لك مثل العقرب او يعارضونك فقط لانهم اقرب الناس لك . شوووف حوليك وتمعن اهم شيء التمعن وفكر بكل شيء سوف تشوف بان البعض مرتاح من اقرب الناس ومتاذي من غيره والبعض متأذي من اقرب الناس ومرتاح من البعيد . تخيل نفسك في مجتمعك وغير قادر على التفاهم معهم اذا تريد مغادرتهم او التأقلم معهم ؟؟ سأل محير صح . أدري متشتت بهذا المقاله الي اكتبها الان لاني كل ما افكر فيه عن الحياه  اكتبه لكم واتمنى باني ما اشتتكم . بس دائما اسال نفسي هل الذهاب للبلد الي يريحك والابتعاد عن كل مجتمعك يريحك من مشاكلهم . مافي شيء مستحيل .

في المذكره القادمه سوف اتكلم عن زواج الوافدات وانواعها

التاريخ واليوم

كيف الحال البارحه كان الجمعه وطلعنا من الشباب وتمشينا في أب تاون مردف وبعدين تعشينا ورحنا اخر شيء مقهى في جميرا ويعتبر هذا المقهى راقي يعني ايوني هاي كلاس المهم خلووونا في الاهم . انا استغربت من البنات وأنواعهن الي يروحن المقاهي في منهن الوافدات بالبنطلون والقميص بس متعدلات تعديل مب طبيعي علشان يصيدن الشباب وما شا ءالله شباب هذا المقهى دفيعه بالقوو يعني لو البنت بتطلع من المقهى معاها واحد عيشها خلوونا من هذا النوع لان هذا النوع قديم ومتواجد في مناطق المشكله في بنت البلاد  شوو اييبها هذي الاماكن وبعد متعدلات اخر تعديل اسأل نفسي هل يايات يفرجن عن نفسهن او جايات يدورن على صيده محترمه يعيشهن لمده اسبوع . والله يا ناس بان تعديل عن تعديل ينعرف وخاصه الشباب قاموو يعرفون كل اساليب البنات من مكياج ومن تنفيخ الشفايف والخدود  عافانا الله من هذا الاشكال . والله ما بجذب عليكم باني حطيت البلوتوث لي حبوبه  وشوو المسجات تيني قالي ولد عمي لو تلفونك جديد وتبا تعبيه من السوالف الحلوه حط اسم بنت فقط وشوو شو بيطرشولك . الله يستر على البنات و خاصه بنات البلاد . نحن الشباب لنا نشوف بنات في هذي الاماكن تحز على خواطرنا لان عرضها صيد الشباب نقوم بخواطرنا لهذي الدرجه وصلت بعض بنات البلاد في المقاهي . انا ما اقول هذا الكلام من الهواء هذا من واقع انا شفته واذا تبون تعرفون اسم المقهى اسمه مقهى فودو   الي جنب مركز مريكاتو . والله الشباب بعد مساكين انا مستغرب منهم اوكيه المعتاد عن الشباب بانه يشوف وحده والوحده تشوفه وبعدين يطرشلها هذا المعروف عن الشباب بس بعض الشباب يطرش بلوتوث على كل اسامي البنات هههههههههه بدون ما يعرف شكلها .

دايما اقول الطيور على اشكالها تقع وفي بعض الناس من كثر زينتهم يخترب مظهرهم كامل ويصيرون عنقاش هههههههه .  بارحتمس غيرت التقويم وشدووه عدل اليوم ضروسي رايحه في عينها ههههههه .

التاريخ واليوم

السلام عليكم ورحمه الله وبركاته بصراحه البارحه وصلني بلوتوث من احد الشباب على هذا اللقاء لأحد الاخوات  بالهاتف لبرنامج بو راشد في قناه او اذاعه عجمان . بصراحه لما سمعتها فرحت كثيرا لان في ناس تعرف الحقائق الي صايره في مجتمعنا وهي تكلمت بكل صراحه وانا وضعت المقطع هنا لكم علشان تسمعون وياليت في ناس مثل هذي الانسان . بو  راشد شوو وسعه غير يسمع بس ما يقدر يسوي كثر من جذا او يكلم اداره الوزارات .

اضغط هنا لتنزيل الملف

ما بتصدقون شوو سمعت البارحه على قناه او اذاعه عجمان الساعه ثلاث بالليل امممممم ما ادري هل اتكلم او اسكت  بما ان بو راشد عودنا على حريه الراي انا بقولكم   في واحد لبناني يرد على الاتصالات  قولو  منوو يتصل  بنات متخاصمات مع حبايبهن ووحده تقول انا حبيبي زعلان عليه قالها ليش قالتله لان زخني بان عندي تلفون ثاني وانا احبه وهو زعلان الحينه والمتصله الثانيه  تقول انا احب واحد وهو ما يعبرني او شيء جذا  وهيه بالصف الثالث ثنوي على ما اعتقد  انا لحقت على اخر المكالمات الله يعين والله  انا اليوم حاولت اتصل لبوراشد علشان اكلمه عن هذا الموضوع كان خاطري اعرف رايه بالموضوع هذا .

التاريخ واليوم

اليوم الاربعاء دخلت النت بس النت كان مقطوع وخبصت بالكمبيوتر فكرت بان الكمبيوتر خربان وبعدين طلع بان النت مقطوع عليه فاتوره شهور  المهم رحت ودفعت الفاتوره ورجعت او ما فتحت النت شغلت المنتدى وعلى طول فتحت هذا الموضوع وعجبني وايد وانصح الكل يقراه http://www.algreeb.com/vb/showthread.php?p=77506&posted=1#post77506

 واخيرا اشتريت تلفون فنان شكله  وهو  N95  8GB   اليديد بو شاشه عوده فنان  اكشخبه الحينه لما ايلس  في استار بكس لازم احط التلفون على الطاوله هههههه . تعرفون اكتشفت شيء انا اقول ليش الشباب لما يجلسون في استار بكس يحطون تلفوناتهم على الطاوله مع ان لما يحطونه في مخابيهن بيسمعون منو يدق بس تعرفوون شوو طلع   بان لو وصلهن بلوتوث ما يشوفونه  مشان جذا يحطون التفون جدامهم علشان على طول يشوفون اذا احد ارسللهم . وتعرفون هذا الوقت البنت الي ترسل بلوتوث يعني ما يحتاج الشباب يتعبون انفسهم بعد .

هذا الاسبوع كنت اتابع راديو الرابعه   برنامج أبو راشد   برنامج وايد زين ويحل مشاكل بعض المتصلين   بس مرات يمسخ احسبه من الاتصالات وتعليقات واحسبه مقيد شوي بعد مافي حريه وكلمه الصراحه .

التاريخ واليوم

أكيد البعض منكم سمع اغنيه تحبني ولا تحب الدراهم .  هذا كثير من الشباب وكثير من البنات يسال نفسه او يسأل حبيبته او حبيبها تحبني ولا تحب الدراهم . انا بتكلم عن الناس الي عندهم الخير الكثير.

بقولكم شيء واقع ليش الشباب عندهم ديون في البنوك  تعرفون ليش لانهم ياخذون سلفيه ممم بس ليش السلفيه هل بيعملون مشروع  امم ما اعتقد  الله يسلمكم ياخذون سلفيه علشان يشترون احسن السيارات واحس الارقام وكل شيء احسن شيء تعرفوون ليش يشترون كل هذا  كله مشان البنات الحلوات يشوفون عليهم يعني بالعقل  الي عندهم سيارات اخر موديل وكل شيء جديد عندهم في بعض البنات بيشوفون عليكم بس علشان شوو   مثل ما تقول الاغنيه الدراهم  ( تحبني ولا تحب الدراهم ).

بس هل تفكرون بان الي ينحب علشان دراهم مستانس مع الي يحبها او تحبه اممم في نظري الخاص ما اعتقد لانه مبني على اساس غلط ورغبه غلط . وفي ناس يتزوجون من بعضهم البعض بس علشان الدراهم . يا هذي دراهم الي خبلت بالناس . زين الانسان عنده فلوس وبنفس الوقت يكون قنوع وبسيط .

التاريخ واليوم

من اسبوع وانا فيني الحيرة على تلفون يناسبلي وما اعرف شوو اختار من التلفونات كل واحد احسن من الثاني انا بخاطري تلفون صغير فيه كاميرتين وشكله مقبول . واخر شيء ما شتريت اي تلفون .

اليوم رحت معهد الشرق الاوسط علشان اخذ ورقه للشغل علشان يعطوني تفريغ لأدرس واستغل الوقت . عندي فكره جديده بالموقع مثل ما تشوفون مذكراتي او مقالاتي كلها اكتبها بالموقع الحينه بخلي الزوار ايضا يكتبون بس بدون حوار على المواضيع فقط للقراءه انا برتب كل شيء وان شا ءالله بعطيكم علم في اقرب وقت .

عندي مواضيع لظواهر كثيره في المجتمع من أطباع زينه واطباع مب زينه  واشياء غبيه واشياء ذكيه بس انشاء الله بتطرق باني اكتبلكم بقلمي الحر بهذي المواضيع .

ما اعرف شوو اكتبلكم في هذي المذكره بس ابي اعبيها ههههههه   باجر بنطلع ويا الشباب بالدراجات يا سلام بحاول اصور كم صوره وكم فيديو علشان اخر الليل نضحك على انفسنا هههه.

التاريخ واليوم

"اوووف اوووف يا ويييلي يا وييييلي يا لايم بعد لا تلوم خلي القلب باحزانه وبعد ما تلوق بالضحكه ودمعتي بعيني حيرانه "  هذا موال عراقي قاعد اسمعه الان وانا اكتب هذا الموال .

المهم ماخبرتكم اخر اخبار هذاالاسبوع  يوم السبت رحت حلف نظمته مجموعه الامارات للانترنيت بدبي  وهو حفل تكريم طالبات نادي ابداع كليه الفجيره رحت هناك ولقيت ترحيب من مجموعه الامارات للانترنيت ومديره نادي الابداع وكان الاحتفال وايد حلوو وكرموو الطالبات وتفجأت بانهم كرموني انا بعد لاني استاذهم لووول المهم استانسنا في الحفل . رجعت الذيد وبعدين على المغرب طلعت ورحت أبوظبي اول ما داومت كان هناك وجع بقلبي ما اعرف من شوو السبب وترخصت من الشغل ورحت افصل وعملولي تخطيط للقلب وباليوم الثاني عملولي تصوير منظار للقلب تصدقوون اول مره اشوف قلبي ينبض أمامي سبحان الله كيف التقنيه وين وصلت . وباليوم الثالث في بوظبي جاني زكام قوي وما قدرت اطلع من الغرفه حسيت باني مريض وايد المهم مشيت الايام وفي يوم الاربعاء على طول طلعت للذيد لان ما عندنا شغل وايد وقلت باخذ اجازه لنفسي من يوم الخميس .

في هذا الزمن صعب تلقى انسان يفهمك لانه كله وقت مصالح في مصالح. بس تصدقون هناك مواضيع في المنتديات مثل كلمات وامثال وايد حلوه تعجبني اقراها وهيه شوي تعطي الانسان او بالاصح امل بالحياة او انه ياخذ منظور ثاني للحياة او الموقف الذي يعيشه . سبحان الله مرات تشوف ناس ما تعرفهم ترتاح نفسيا اول ما تشوفهم وفي ناس تعرفهم من سنين لما تشوفهم تحس بضيقه  هل هذا كلامي صح ما ادري يمكن باني انا اتمادى بالكلام شوي بس هذاالي احسبه انا .

الضحك والسوالف على بعض الناس حلووو تشوفه بس مب معناه بان الانسان مرتاح في داخله . في ناس شاله وايد بقلوبها بس تضحك والبعض الاخر يخرج الضيجه على بعض الناس ويظلمهم .  الناس تقول الغربه صعيبه ومب زينه بس عند بعض الناس الغربه حلوه .  ما ادري احس مذكرتي هذي أقفز من موضوع لموضوع لاني ما فضفضت من اسبوع يالله هب مشكله خذووها بروح رياضيه.

التاريخ واليوم

انا ما ذكرت سيرتي للتقنيه لأعطاء دروس الفوتوشوب هناك كان اول درس لي هناك الاسبوع السابع يوم الثلثاء  والتدرسي شيء طيب والحمد لله حسيت من كلام الاداره بان الطالبات استفادن كثير من دروسي البسيطه وطريقه شرحي وكان باستقبالي مديره نادي الابداع بتقنيه الفجيرة للبنات وكان استقبال ممتاز جدا بصراحه وغدوني بعد وبعد الغداء رحت الكلاس وشفت الطالبات ودرستهن وكانن متحمسات كثيرا للدروس . واليوم الصبح رحت التقنيه مره ثانيه لأعطاء الدرس الثاني للبنات  وانا كنت شوي سريع بالشرح لان ما كان وقت وكنت ابي اوصللهم المعلومه الصحيحه وكنت  احاول اوصل لهم  الدقه والصبر في التصميم هذا اهم شيء  وربط كل الدروس بتصميم واحد . واليوم كان قبل الدرس معرض للنادي ورحت معاهم المعرض وكان جنان ما شاء الله على الطالبات سون اشياء حلوه واشتري من هناك علم الامارات صغير كانت ميداليه وحطيتها بتلفوني حركات بعد هههههه المهم وشفت سمكه عجيبه واستغرب منها لانها كانت مرسومه على جسمها علم الامارات وكانت للعرض فقط وسولفت مع المدير للكليه  وكان يسكن قريب من منطقتي بامريكا ونسولف وياه وعجبه اسلوبي وقالي شوورايك تدرس الاساتذه لهم على الفوتوشوب هههه . تصدقون بأني اول مره ادخل كليه بالامارات  واستغرب بان نظامهم وايد غير عن امريكا وايد  والله اشتقت لايام الدراسه والكراف . كان خاطري اعطي الطالبات مزيد من الدروس مع التطبيق بشكل مفصل بس ضيق الوقت ما ساعدني .وأنا اشجع كل طالبه تشترك مثل هذي النوادي للابداع وخاصه في الفجيرة لان المديرة للنادي وايد طيبه وخدومه وتسعى لأفاده الطالبات . وفي النادي التقطو صور تذكاريه للنادي وما ادري وين بتظهر الصور خاطري اشوفهن واشوف شكلي في النادي شوو صاير هههههه متبهدل ههههه . وأتمنى من كل قلبي بالتوفيق لهذا النادي لانه يفيد الطالبات في مجال التصميم .

التاريخ واليوم

كنت أتصفح في المنتدى ودخلت موضوع الاخت dr_sara اضغط هنا لترى الموضوع  وعجبني الموضوع كثيرا وكان عنوان الموضوع هو اليكم افضل 40 حكمه عالمية وكنت اقرى الحكم وانا عارف ما بتكون اخر مره اقرى هذا الموضوع لاني برجعله ثاني وثالث مره ما ادري لاني احس لما اقرى من الحكم ارتاح نفسيا الحكمه التي شدتني هي اول حكمه والي تقول (( ان تضيء شمعة ضغيرة خير لكمن ان تنفق عمرك تعلن الظلام )) الي فمته بان الشيء القليل خير من الشيء الكثير الي يطول وقته ويمكن ما تحصله . وهو قريب من كلمه القناعه .

التاريخ واليوم

الحمد لله يوم الخميس رحت من الصبح من الفجر  لفجيرة علشان اجيب الدراجه الرابتر 2008 الجديدة من هناك والحمد لله شليت القالوصه ورحت بسيارة ولد عمي  لين هناك واشتريت الدراجه ورجعت البيت وعلى طول على ظهر الدراجه علشان امرنها المفروض امرن الدراجه عشر ساعات بدون ضغاط بس بو الشباب ما استحمل يوم الجمعه بعد صلاه الجمعه قالولي الشباب يالله نروح رحله طويله قلتلهم يالله  ورحنا لحد الفايه وين الشباب كلهم هناك وانا بو الشباب ما اعرف اسوق الدراجه لين هناك علشان اصعد والعب مثلهم المهم تمينا هناك لحد المغرب ورجعنا على المغرب بعد ما رجعنا على طول رحت اسبح ورحت الميدان جنب بيتنا اشوفهم وشفت الشباب كلهم مخترشين على اليوله حاولت اصور صور عدله بس ما ضبط ويايه الوضع لاني كنت وايد بعيد المهم استانسنا بشوفتهم ايولون  وبعدين رحت تعشيت ورجعت البيت على  الثاني عشر ونص هلكان وعلى طول حطيت راسي ونمت وصحيت اليوم نشيط على الصبح بس كان ظهري شوي يعورني لاني كنت على طول اليوم فوق الدراجه . باجر خلاص برجع للشغل في بوظبي  يعني برد لخطوط بوظبي وللملل من جديد هههه . ان شا ءالله اتذكر يوم الاثنين اروح العين لان عرس ربيعي يوم العيش شكلي بطلع من بوظبي للعين  لازم نحضر عرسه المهم بخليكم مع صور الدراجه

اضغط على الصور لترى المزيد من الصور

التاريخ واليوم

كل فتره أقول بتصفح المنتدى وخاصه القسم العام عندي بالمنتدى واحب أقرى المواضيع التي لها فائده وعبر وحصلت موضوع ولقيت فيه هذي الجمل

القـناعة دليل الأمانة
والأمانة دليل الشكر
والشكر دليل الزيادة
والزيادة دليل بقاء النعمة
والحياة دليل الخير كله
 

قريتها كم مره وأكتشفت بان القناعه شيء كبير جدا اكثر مما اتصور في لما تشوف حولك ما تشوف ناس قنوعين .

وفي موضوع ثاني في المنتدى وهو http://www.algreeb.com/vb/showthread.php?t=5353  قريب الموضوع واخذت هذا المقطع

لا يحزنك إنك فشلت مادمت تحاول الوقوف على قدميك من جديد

هذي الجمله رائعه لانها تمسح الحزن اذا كان هناك الاصرار على المقاومه.

التاريخ واليوم

تعرفوون بان الشتاء على الابواب وبأن الجوو يعتدل كل يوم وخاصه صوبنا وصوب الرمول وكل الكشيته يجون صوبنا وحبيت اشتري دراجه علشان اروح اتمشابها بالبر شوو احلى من البر يعني المهم بعدني ما اشتريتها .انا شكلي نحس كل ما اروح وكاله يقولولي الدراجات خلصت او ما عندنا اللون المطلوب  شوو هذا النحاسه واخر شيء اتصلت فجيره وتخبرتهم عن الدراجات وقالولي يمكن  تكون عندنا وحده يوم الارببعاء القادم قلتلهم اوووكي  بتصلبكم يوم الاربعاء وبنشوف اذا جاهزه الدراجه ولا لا . وانا على طول رحت فصلت قالوصه للدراجه وبعدين بسير اشتري لبس للدراجه اهم شيء الوقايه من الصدمات والجروح بالدراجه تعرفون لازم نلعب ونسوي حركات بالدراجه هههههه الي يقول الحينه بشل على تايرين ههههههه . المهم انا شكلي بسوي تيم للدراجات باسم الذيد .

التاريخ واليوم

أولا حاب أقولكم مبارك عليكم عيد الفطر السعيد واتمنى بقضاء أسعد الأوقات مع الاهل والاصدقاء والربع . وتعرفون احلى شيء صباح العيد لما الأهل يجتمعون وكل احد يزور البيت الثاني حياه حلوه وان شاء حلوه دايما عليكم . بعد غربه طويله بأمريكا وعدم قدرتي على الفرحه بالعيد بالوطن انا اليوم في ألمانيا  وأعيد بنفسي . ما حبيت أعيد بالامارات حبيت أكون بعيد عن هذي الفرحه  ولذلك لأسباب خاصه. وان شا ءالله باكر راجع البلاد لأني مليت من ألمانيا بصراحه مافيها شيء غير العنصريه وغير البنايات التراثيه وما لقيت فيها الربشه او الاستايل الامريكي الي انا عشته في أمريكا . اكتشفت بان اوروبا غير عن امريكا من نواحي كثيره . المهم اتمنى لكم عيد سعيد

التاريخ واليوم

ما ادري شو صار فيني وحبيت اروح ألمانيا  في وقت رمضان أول سبب أزور عمتي بالمستشفى في ألمانيا وثاني شيء هروب من الضيق الي فيني وأنا في الامارات. كانت طيارتي يوم 2 أكتوبر 2007  المهم رحت المطار بس من نحاسه اخوكم محمد طلع الفيزا مالي لأمانيا سوف تبدأ  بتاريخ 3 أكتوبر 2007  يعني لازم انتظر بالامارات يوم كامل المهم انتظر وبالباكر الصبح سافرت لألمانيا وصلت ألمانيا واستقبلني سياره السفاره مثل ما وصاهم عمي . المهم وصلت فكرت نفسي بنجلس في ميونخ  بس ظهر بان المنطقه الي فيها المستشفى مكان بعيد عن المدينه وما فيها شيء ابدا جلست في المنطقه لحد اليوم وهو تاريخ 8 أكتوبر 2007 يعني اليوم بتاريخ المذكره هذي ركبت التكسي وقلتله ودني على محطه القطار المهم رحت هناك وحجزت تذكره على ميونخ  ويالله يالله فهموني من لغتهم لانهم ما يتكلمون انجليزي ابدا ما اعرف ليش . المهم وصلت بعد ساعه لميونخ وشفت عالم كثيره في ميونخ واحلى شيء المراكز الي تحت الارض والله عالم ثاني شوارع وكلها محلات اقول بخاطري ما تخلص هذي المحلات تحت الارض وهذا الاشارع كم بيشلهم . المهم تميت اتمشى من شارع لشارع ولا اعرف وين اسير استكشف المنطقة وسالت عن مسجد ولقيته وصليت الحمد لله وظهرت . انا كنت اعرف بان عرب في أوروبا بس ما توقعتهم بهذا الكثر كلهم مغاربه ودخلوو العراقيين الحينه . كل محل خضار لعربي وكل محل للتلفونات او للكمبيوتر او الاتصال الخارجي للعرب  عنبوه شوو خلوو.  ألي عجبني اكثر المسلمات المتمسكات بدينهن وحجابهن والله اعطيهن احترام كبير بصراحه مب العربيات الثانيات واعوذ بالله ما يحترمن الشهر الكريم . تصدقون الحين باقي شوي عن صلاه المغرب بس ما اعرف متى بيأذن بس خطرتلي فكره وهي لما اشوف الشمس تغيب عن ناظري بسير افطر في أي مطعم ولا شوورايكم المهم الحينه بخليكم علشان اروح برع .

فندقي في ألمانيا الله يسلمكم انا رحت ميونخ في وقت غلط وهو وقت عيد لهم والله ما ادري شوو هذا العيد لهم بس المهم كل الفنادق مزحومه عندهم وتميت ابحث عن فندق لحد ما لقيت فندق وقالي في غرفه بثلاث اسره وسعرها غالي قلتله لا حول ولا قوه باخذها الحايه بنت حرام  المهم احذت الغرفه تعرفوون او تصدقوون بان مافيها حمام  والحمام لها مشترك بالغرف كلها  ولا فيها تلفون ولا تلفزيون شوو هذي النحاسه  ولا اليوم المفروض يوعوني الساعه 12 الظهر علشان اظهر  هم جوني الساعه 11 دقو الباب عليه ويقولولي يالله اظهر من الغرفه والله حاله . قلت الحمد لله فنادقنا وايد حلوه ورخيصه  وعلى مستوى عالي من الخدمه . انا استغربت من هذا الشعر بعد ما فطرت رحت الغرفه ورقدت لحد 11 بالليل ولما ظهرت من الفندق النحس ما لقيت احد يمشي بالشارع  قلت وين الملايين الي كانت تمشى بهذا الشارع  طلع بان كل شيء يسكر من وقت عندهم رجعت الفندق وبغيت امام وما قدرت لاني شبعان نوم المهم لما صحيت الصبح على طول على سكه القطار وحجزت تذكره ورجعت للمنطقه الي جاي منها .

التاريخ واليوم

من كم يوم التقيت بصحفية بجريده البيان في الشارقه والله استوالي موقف محرج لما رحت اقابلها . رحت الله يسلمكم علشان أقابلها في على البحيره  . وانا بو الشباب مروح بالطريق لما وصلت قريب  البحيره ما يبنجر التاير أقصد العجله  وأوقف السياره قلت شوو هذي الفشله جان اتصل فيها واقولها انا اتعذر  ما اقدر اجي على الموعد  قالت ليش قلتلها لان العجله فرقعت كعكعكعكع  المهم قالت بتمر عليه مرت عليه ورحنا وسوينا المقابله ورجعتني عند السياره  وبعدين قلت كيف اصلح التاير المبنجر  رحت السوبرماركت ولقيت هندي جان اقوله بعاطيك فلوس تعال صلحلي وفرح الهندي وصلح المسكين .

المهم ادري تبووون تشوفون اللقاء  انا نسخت اللنك من موقع جريده البيان

http://www.albayan.ae/servlet/Satellite?c=Article&cid=1190114591350&pagename=Albayan%2FArticle%2FFullDetail

التاريخ واليوم

شوو اخباركم وعلووومكم  خلاص رمضان قرب على الابواب الحينه  ومبروك عليكم الشهر مقدما يا زوار موقع الغريب الكرام والكريمات بخبركم موقف في سيتي دبي صارلي وهو انا رحت كارفووور علشان اشتري مشغل الدي في دي  علشان اشوف افلام تعرفون ملل لان عندي اجازه وملان طول الوقت وعندي افلام ولا شفتهن .دخلت كارفور واشتريت الدي في دي وطلعت وانا طالع رايح السياره شفت تلفزيون دبي من بعيد وانا امشي جهه الدرج اشوف المصور والمذيعه ينادون عليه اقول شوو السالفه وقفت عندهم وقالولي اذاحاب تسوي لقاء ويسالوني عن رمضان قلتلهم بصراحه انا من اربع سنوات خارج البلد وهذا اول رمضان وانا قلت يمكن هم ما يريدون واحد متغرب وصار العكس تحمسوو اكثر قلتلهم اوكيه يالله المهم لما بدأو التصوير المذيعه على طول سالتني عن رمضان وانا قلتلها ليش ما سالتيني عن أسمي وضحكت وقفوو التصوير قالتلي لا بس اساله سريعه قلتلها اوكيه يالله نبدأ المهم سالتني عن رمضان وانا جاوبت عليها  قالتلي المذيعه متظهر يوم الاربعاء قبل شهر رمضان الكريم العصر تقريبا بعد الساعه 5 قلتلها اوكيه وبعدين ظهرت من السيتي سنتر مممممم ما اذكر وين رحت بعدين دايما اروح دبي اتجول بروحي بعض الاحيان اكون بدبي اتمنى لحد الساعه 2 بالليل احسن من قعده البيت ولا شوورايكم  . انا فرحان كثير لان عندي اجازه لحد بعد رمضان يعني بكون فاضي لشهر رمضان كامل والحمد لله الان بديت أسوي رياضه علشان شوي اخف لاني صرت دب من العيوش واللحوم الي ناكلها هنا. 

التاريخ واليوم

في هذا اليوم كان يوم السبت وأول يوم في شهر تسعه لعام 2007 رحت دبي وجلست مع الشباب في مول الامارات وبعدين طلعنا بنروح مكان ثاني وفجأه وصلني مسج  بأني فزت 100 درهم بالصكوك الوطنيه وكان استانس تعرفون لو تفوز بأقل شيء بعدك تحسن بانك فزت وتفرح بس انا في داخلي استغربت أول مره أفوز واحس بفرحه الفوز قلت الحمد لله . بعد ما خلصت من عند الشباب قلت بتمشى لحد ما اوصل بوظبي  المهم كنت اسوق 130 لاني كنت مفكر رادارات شارع الشيخ زايد حدها 140 المهم الرادار ما قصر وزخني  قلت يالله الجائزه مالت الصكوك راحت وتمشيت لحد ما وصلت بوظبي وكانت الساعه تقريبا  4 الفجر وقفت السياره وقاعد ادور على مفتاح الشقه تصدقون بأني ما لقيته والله انجن جنوني ما  عرفت وين حطيته ودورت السياره فوق تحت ما لقيت المفتاح وانا كنت وايد تعبان وفيني رقاد  وقلت مافيني اشوفلي فندق وانا متغصص قلت الا ارجع الذيد واشوف المفتاح هناك  وانا راجع كنت مسرع وايد أدري مجنون بس شوو اسوي كنت اسوف 240 من القهر الي فيني وانا فيني رقاد بس الحمد لله سلمت من شاحنه كبيره مره ومره من التحويلات في دبي وانا شوي برقد بالطريق  المهم لما وصلت قريب  مركز التنين في دبي  بعد رادار ثاني زخني وما قصر فيني  أقول بخاطري اليوم خربان خرابان بالنسبالي اقول ما يسوى عليه فوزي بالصكوك بمائه درهم والله وجعت البيت هلكان وصلت البيت والنور طالع  ما اشوف شيء غير الفراش  والحمد لله وطيت راسي وما صحيت غير الساعه 2 الظهر . وبعد ما صحيت دورت على المفتاح وما لقيته وما ادري شوو بسوي شكلي باجر الصبح بروح الدوام بخليهم يعطوني مفتاح جديد . أدري مب زين اقول عن عمري نحس او غير محظوظ بس هذا الي احسه فيني باني غير محظوظ ابدا  مب بس بهذا في اشياء وايد   بس دايما أقول الله كريم .

التاريخ واليوم

صح والله لما قالو الناس أجناس في كل مره اروح مكان اشوف ناس أنواع واشكال منهم الطيب والخلوق ومنهم الخبيث والحقود والشيء الزين بان الزين تعرفه من ويهه وتبتسمله والقهر لما تشوف الخبيث تحاول تجاهله ولكنه مصر على خبثه. الكبرياء عند بعض الناس وخاصه عندنا ليش شوو الي عندنا فلوس هههههه بتضحكون مب فلوس   لالا عندهم ديون لين راسهم وبعدهم متكبرين على فلوس الديون . ما ادري شوو صار فيني أقفز من موضوع لموضوع وخاصه أطباع الناس لاني جديد عليها واقدر اشوفها في عيونهم وألاحظها لاني غبت عنهم فتره طويله . ولما رجعت فكرت الناس طيبه ونحن عرب ومسلمين نحب بعض ونخاف على بعض نفس امريكا بس والله ظهر العكس ونحن على بلد عربيه ومسلمه . خذت أجازه اسبوعين وهذا الاسبوع بتخلص الاجازه وندمان باني قعدت بالامارات لو طلعت كان خاطري اروح مصر او بلاد الشام أبي اشوف اطباع الناس في هذا البلدان. تعرفون  أشتقت وكل يوم اقول اشتقت لحد ما ملت مني الكلمه اشتقت لحياتي في امريكا . الحياة هناك بسيطه جدا من غير تفكير ناس يسلمون عليك في الشارع ويبتسمولك وكل شخص هناك ينشغل بحاله . انا عشت هناك ما شفت حقد على بعضهم البعض بس يشجعون بعضهم البعض .  أدري البعض بيقرى وبيضحك على كلامي بس هذا انا أحب البساطه . تصدقون بقولكم شيء كنت اقرى كتاب في امريكا عن واحد افريقي كيف عانا في حروب افريقيا  وما كملت القصه ولما رجعت الامارات  ما قدرت اكملها ما ادري احس لو اقراها منوو بناقش فيها او منوو بخبر  او منو بفيده من هذي القصه او منوو يعرف شوو صاير في افريقيا . يالله بخليكم لا اخبص اكثر.

التاريخ واليوم

أدري من فتره طويله ما كتبت في قسم المذكرات بس شوو اسوي مع اني في اجازه بس احس باني ما اريد اكتب وما شيء جديد في حياتي غير نفس الروتين . اليوم  رحت الله يسلمكم  دبي ومريت على وافي سنتر لان ولد عمي قالي هناك المهم رحت لحد هناك بس لما وصلت السنتر شفت مركز السلام في وافي سنتر ومريت عليه وعجبتني كاميرا فيديو وايد حلووو   وقلت ليش ما اشتريها لمشروع بدو الامارات والمهم شفت واستفسرت عن الكاميرا واخر شيء اشتريها بمبلغ شوي غالي بس يالله تستاهل. لاني ابي استخدم كاميرا الفيديو وكاميرا الفوتغرافيه لتوثيق الماضي والجولات الي بسويها مع البدوام في المناطق المتعدده . وأول منطقه سوف أبدا فيها هي فلج المعلا  تبعد عن الذيد 3 كيلو متر بالسياره . وبعد هذي المنطقه بفكر بمنطقة ثانيه ان شاء الله وبتشوفون حلقات الغريب لمشروع بدو الامارات اول بأول ان شا ءالله . مع اني أريد دعم لهذا المشروع بس شوو اسوي سوف احاول الي اقدر عليه . وفي مشكله ثانيه الحين ما لقيت احد يروح معايه في الجوله كلهم يستحوون ما اعرف ليش  لاني اريد احد يصور فوتغرافي ويصور فيديو ويسال البدوو كل هذا ما اقدر عليه انا ممممممم والله حاله بس يالله بسوي الي اقدر عليه لانجاز هذا المشروع . شوي شوي بكسب الخبره من هذا الشيء والمعرفه بالبدوان كلهم ان شاء الله . وعندي امل شديد بهذا المشروع مع ان وايد ناس حاولوو يحبطون فيني بكل المجالات بس اصراري على هذا الشيء اكبر منهم . والشيء الثاني انا رجعت من امريكا وعارف حاله الناس هنا بأنهم ما يشجعون ابدا  فقط يحبطون تعرفووون ليش بس علشان يظهرون انفسهم وهذا الي لاحظته منهم . بس الي بقولكم ترقبوو جديد الغريب ههههه .

التاريخ واليوم

أول سفرة في نانكوك:

وصلنا الصبح لبانكوك بتوقيت بانكوك والساعه ثلاث بتوقيت الأمارات وهذا يوم 27-7-2007 المهم وصلنا المطار ونزلنا ندور على تكسي وقلنا للتكسي وصلنا عندق ( أميران ) المهم وصلنا هناك واتصلنا للشباب ربعنا كل تلفوناتهم مغلقه المهم طلعنا من الفندق وليقنا فندق ثاني جنب الفندق هذا رحنا الغرف وارتحنا شوي ونزلنا اغراضنا وبعدين نزلنا تحت نتمشى . أقولهم يا شباب انتو سكنتونا مكان لووث قاموو يضحكون قالو هذا الشارع الي العرب كله تجي علشانه قلت ول هذا الشارع وسخ وايد انا بحطلكم صور عن الشارع العجيب للعرب وحكموو بنفسكم. المهم بعدين قلتلهم نبا ناكل أكل زين ورحنا مطعم المصري وتعشينا هناك . ونحن في الرده نشوف محلات السفر والسياحه في كل مكان ومحلات المساج على الشارع. وبعدين رحنا عن الشباب ربعنا يلسنا وياهم وتمشينا. فليل رحنا المول بس اول ما وصلنا كان يسكر وشف هناك محلات الرسامي بقلم الرصاص والله لما شفتهم استغربت كيف يرسمون الصور بدقه عاليه كان خاطري اتعلم هذا الشيء  المهم بعدين عطيتهم صورتي للتخرج علشان يرسمونها بقلم الرصاص بحطلكم الصوره علشان تشوفونها. ورجعنا الفندق ونمنا وانا اول شخص يصحنا من ربعي نشيط هههههه المهم ما ادري اليوم الشباب شوو مخططهم ووين بنروح اقولهم خلوونا نروح المركز الي كله الكترونيات ابي اشوف شوو عندهم من الاكترونيات الي تستاهل اشتريها.

ثاني يوم في السفرة 28-7-2007

في شارع بانكوك أو بالاصح شارع العرب تشوف العرب في كل مكان وتشوف البنات والرجال أنواع واشكال استغربت بصراحه من البنات الي لابسات بناطلين ضيجه  ومب مستره  وكل وحده تحاول تطلع احلى من الثانيه وقولو بس وين يمشن هههههههههه يمشن في اوسخ شارع في العالم اشوفه ولا فرحانين بعد . خلوونا من كل هذا فندق كريس أونه فندق العرب هذا اون الشواب يمرضون في الصيف استغربت يعني المرض ما ايهم الا بالصيف وخاصه الشواب يحبون يجون لوحدهم تعرفوون ليش علشان البنات واللعب والمسخره الي صايره في بانكوك وخاصه في فندق كريس . رحت بالليل بعد ما تعشينا  لفندق كريس علشان نلعب بولنق  أشوف الشواب بعدهم صاحين ما رقدوو والبنات أنواع واشكال يتمشن من بين الشواب. قاعد افكر اقول الشواب لما يكونون مع حريمهم اونهم يقولون لهم بنروح نيلس ويا ربعنا  والمساكين الحريم ما يعرفن بأن الشواب يمرحون تحت في اللوبي لفندق كريس. قلت الحمد لله ما سكنت في هذا الفندق الي ما يسوى شيء. أنا المسكين عجبني أكثر شيء المنقا والأناناس الي يبيعونه في الشارع مره كنت ابا اشتري ومره عليه وحده كبيره بالسن قالت يا عيالي ما لقيتي مكان تاكلون الا هنا ومشت عنا تميت افكر في كلامها أقول بخاطري هذا قلبها كبير العيوز واقول في خاطري بعد ما اقدر اقاوم الاكلات يعدلونها بشكل وايد حلوو بس يالله مشينا الحال . اليوم أو بالأصح بعد أربع ساعات بنروح لجزيره يسمونها بوكت يمدحونها وبعدين عن اللوث في شارع العرب. مستغرب من الناس الي يبون يجلسون عشر وعشرين يوم على شووه انا يالس كم يوم وطفرت الشارع مشيناه وخلاص شوو بقى.

أول يوم في جزيرة بوكت 31-7-2007

كنسلنا حجزنا في يوم السفر لجزيره بوكت وكنا قاعدين في اللوبي ونتمشى شوي لحد الساعه 7 المغرب المهم طرنا من مطار بانكوك لبوكت ووصلنا على الساعه الحادي عشر ليلا نزلنا هناك ووصلنا الفندق ووضعنا اغراضنا وطلعنا ندور على فندق في الشارع أقول للشباب وين العالم وين راحت نسينا بان الساعه 2 ونص ليلا نحن طالعين هههه المهم رجعنا الفندق وكلمنا رجل الي يحجز للرحلات في الجزيره بأن يحجزلنا بالباكر رحله لجزيره وبعض النشاطات بالرحله المهم بالصبح اليوم الثاني صحينا الصبح الساعه 7 وذهبنا للافطار وركبنا الباص الله لا يراويكم شكله صغير وكراسي ضيقه المهم ركبنا وفكرنا نحن لوحدنا بيوصلنا ما خلابنا مكان وراحه يشل ناس ثانين المهم اخر شيء وصلنا  للمينا علشان نركب الطراد الي بيودينا الجزيره الثانيه المهم كانت اول تجربه لي بركوب هذا النوع من الطرادات المخيفه والسريعه  ركبنا ومشينا حوالي 40 دقيقه في البحر وانا اقول هذا البحر الي ضربه السونامي والطراد يروح فوق تحت مع الامواج . المهم اول توقف كان في شاطر وايد روعه وانا بحط صوره وبتشوفونه بنفسكم وايد حلوو كان تمشينا والتقطنا بعض الصور بالشاطئ وبعدين ركبنا الطراد مره ثانيه وذهبنا لمنطقه فيها سبلان وايد كان حلوو المنظر  وبعدين رحنا منطقه ثانيه سبحنا بالبحر لنرى المناظر الي تحت البحر الشباب الي معايه ما نزلوو البحر ما اعرف ليش بس انا شليت ثيابي ولبست لبس السباحه ونزلت والحمد لله كان وايد حلوو شفت شوي العالم الداخلي للبحر المرجان والاسماك . شيء واحد استغرب منه وهو الماء وايد صافي ووايد حلوو عجبني كثيرا والله . كان للرحه التوقف الاخير وهي جزيره صغيره جدا فيها شاطئ وايد حلووو ما اعرف كيف اوصفه الا بالصور الي صورتهن وكل الناس جالسين بالبحر ونحن معاهم وكانت السيفينه الي نحن معاهم محطين يح وأناناس وكان بارد وانا كل شيء اكل اكل اكل لحد ما امتزر بطني واتجول واصور المناظر وجلست على البحر والله نمت حوالي 20 دقيقه لحد ما قالو قومو راجعين لبوكت.

اليوم الثاني وهو اليوم الي كان الشيك أوت للفندق  المهم صحينا الصبح وسوينا شيك اوت للغرفه وبعدين ما عرفنا وين رحنا واخر شيء قلنا خلنا نتمشى  لنضيع الوقت لحد الساعه 6 المغرب لموعد الطياره الي بتوصلنا بانكوك على فكره هذا الكلام الي اكتبه الان هو بالمطار مشغل اللاب توب وقاعد اكتب .

بصراحه بوكت مكان اخس من بانكوك أقدر اكتب كلام كثير عن هذي المناطق بس في كلام ما اقدر اكتبه من الاشياء الي شفناها في هذا البلد.

الأشياء الي تعلمتها من السفره لحد الان هي بأننا عايشين في نعمه ولله الحمد. وتعلمت بان الحاجه تعمل كل شيء تخليك تبيع وتسوي الي ما ي يسويه الشعوب الثانيه . وهذا الشعب شغيل بمعنى الكلمه يشتغل من خاطره وفي اقصى الضروف . وشفت بان هناك اطفال لما يجبون يطلبون يقرون قرأن بس علشان شافوني مسلم يعني بالاصح عطني شيء  والاغرب من هذا اذا ما عطيتهم شيء  يسبونك ههههههههه .

رجعتنا الثانيه لبانكوك 1-8-2007

وصلنا المطار من جزيره بوكت  لبانكوك وصلنا المطار ونحن دايما نروح مكان ما نكون مجهزين حجز الفندق المهم وصلنا ورحنا بالتكسي لحد منطقه العرب في بانكوك وبحثنا عن فندق واخر شيء ذهبنا لفندق Amari أكيد الكل يعرفه وخاصه الي راح بانكوك . المهم اول ما وصلنا خذتلي دش سريع وطلعنا نتعشى قاعد افكر بأي موقف صارلي مممم بصراحه ما اذكر اذا تذكرت في وقت اخر اكيد بكتبه الحين انا قاعد في اللوبي اكتب هذا الكلام خلووني اقولكم شيء عن اللوبي تسعين من مائه منه عرب شباب وبنات لو تشوفونهم بتضحكون كلهم على البلوتوث الشباب شكلهم يسافرون بانكوك بس علشان اللوبي الي ما يطلعون منه ويستخدمون البلوتوث . أيلس واستخدم الكمبيوتر واشوف اشياء تصير امامي  في البعض محترم من البنات ولله الحمد ولكن النوع الثاني الله يعين من الشباب والبنات الي ما يقدر يسويه في البلاد يسافرون بانكوك يسوونه هناك. تبون تضحكون عليه أدري بتقولون الغريب مب هين  غيرت اسم البلوتوث لي من الغريب ل راعية الإمارات  هههه تلفوني ما وقف من الرسايل وانا محطنه تحت الطاوله لان الشباب يشوفون منوو يستقبله والله المسجات بروحها قصه ثانيه ههههههه .

التاريخ واليوم

كيف الحال يا زوار موقع الغريب الاعزاء أدري البعض يترقب بأني اكتب جديد في المذكرات . اخر التجديدات الله يسلمكم باني قررت باني اسافر  تعرفوو وين اكيد لتايلند  كان خاطري اسير مصر ام الدنيا بس ما لقيت احد يسافر معاي المهم ولد عمي عزم عليه نسافر تايلند ووافقت بس المشكله بالتذاكر انا اخذت اجازه بس اليوم طلع اسمي مكتوب بالغلط بس قالنا صاحب السفريات بيصلحه باجر وان شا ءالله يصير خير خاطري اسير الجزر واسير اصور وأيبلكم مجموعه من تصويرات الغريب هههههه وبعض القصص وبعض المغامرات التي سوف تحدث لي في بانكوك .

والشيء الثاني الي حاب اقولكم اياه وهو مجله معروفه بالامارات فجأه اتصلولي تلفوون يبون يعملون مقابله قلت مافيها شيء وافقك وجوو اليوم البيت واكرمناهم وعملوو مقابلتهم معاي وذهبنا للعزبه وصوروو هناك وكانت رحله موفقه الحمد لله الصحفي والمصور كانو سعيدين بالقدوم للمقابله الحمد لله كل شيء اوكيه  أدري في خاطركم تقولون اي مجله هذي يالغريب بقولكم ما بقولكم ههههه بقولكم بعدين  بيظهر التقرير على شهر عشره يعني بعده وقت .

الحمد لله من البارحه وانا اطور في المنتدى وخلصت ترقيه المنتدى والان احاول باني أضبط دروس الفوتوشوب علشان الكل يتعلم من الدروس ويدعيلي بالخير

هيه نسيت اخبركم للي يبا يشترك في مشروع بدو الامارات ياليت يراسلني او يزور موقع بدو الامارات لمعرفه جميع التجهيزات للمشروع  www.badouae.com

التاريخ واليوم

اليوم رقد عدل لحد الساعه 11 الصبح ولما صحيت شفت اتصالات ومسجات بان بأني طلعت في جريدة الإمارات اليوم  قمت على طول تغسلت وفتحت الكمبيوتر وفتحت على موقع الإمارات اليوم  علشان اتاكد من الخبر وبعدين تفجأت بانهم محطيني بصفحه كامله الجريدة ومحطين عنوان الصفحه بالصفحه الرئيسيه للجريده وجان استانس  وبعدين بعد ما سبحت رحت المحل وكل هذا بأبوظبي  اشتريت الجريده ورحت اقراها وبعدين العصر لازم ارجع للمحاضره ولما رجعت قالولي المحاضره ألتغت قلت ياسلام الفرحه فرحتين  قلت خلني اكملها وارجع الذيد ورجعت الذيد وشفت الاهل والاصدقاء المهم ادري بكتب وايد بس بخليكم مع الخبر هذا من الجريده بالموقع لهم شليت اللنك وحطيته لكم

http://www.emaratalyoum.com/ArticleImageEx.aspx?article=16_07_2007_032_002_001&type=2